أكورا بريس 
السلطان المنسي يتحدث إلى نفسه
المكان: فضاء مغلق بعيدا عن السلطنة
الزمان: مغرب يراجع ذاته
الشخوص: السلطان المنسي وسقط المتاع
سقط المتاع: شتي فين وصلتي؟
المنسي: كنت غالط في الحساب
سقط المتاع: وعلاش تغلط وتخليني نخلص معاك أنت تتخلص وأنا نخلص حبس
المنسي: الطمع طاعون
سقط المتاع: وفين هو دابا بوهمو مول اللبن ديالك؟
المنسي: هيا غير بوهمو كلشي داير سيلانص راديو
سقط المتاع: حتى مول الراديو ديال محاربة الفساد صاحبك؟
المنسي: هاداك دار بيان ونساني، كال أسيدي غادي يتفكرني من بعد باش نخرج من قادوس مخيم بن هاشم معزز مكرم
سقط المتاع: غادي تخرج واحد النهار ولكن امْكَرِّمْ وليس مكرم، ولكن نهار الأول علاش كتبتي كدبة علا القضاة ديال القصر الكبير؟
المنسي: ماشي أنا اللي مسؤول، توفيق هو اللي كان رئيس التحرير
سقط المتاع: ولكن نتا هوا المدير السؤول
المنسي: أنا كنت مسؤول علا العمود وتوفيق على الباقي.
سقط المتاع: توفيق خلا ليك حَقُّو في الذعيرة علاش ما خلصتيهاش؟
المنسي: قالو لي متخالصش
سقط المتاع: شكون؟
المنسي: موالين اللبن
سقط المتاع: وكريم التازي علاش صلبتيه؟
المنسي: هاداك كالولي اعطيه حيت هوا من 20 فبراير
سقط المتاع: ولكن داكشي كلو كذوب
المنسي: أنا عارف بأنه كذوب، ولكن هما اللي طلبوا ننزل عليه
سقط المتاع: والشعبي مالو؟
المنسي: الشعبي كان صاحبي وملي تخاصمت مع توفيق ولا معا توفيق – وأنا بقيت معا الصفريوي اللي مهلي فيا
سقط المتاع: والرميد؟
المنسي: الرميد حتا هو بقا صاحب توفيق ولكن عفيت عليه
سقط المتاع: وسعد حصار؟
المنسي: أسيدي هاديك قاضيتو داخلية من الداخلية من خانهم فهو منهم
سقط المتاع: وعثمان بن جلون ديال BMCE ؟
المنسي: هاداك قاضيتو عندها علاقة ببوهمو والصرارفية ديالو بغاو ياخدو البنك كولو.
سقط المتاع: وم احفيظ العلمي؟
المنسي: هاداك قضيتو فيها جوج حوايج، أولا صاحب العديان ديالي توفيق وسمير، والتانيا قالوا لي اعطيه ربما عاينوهم على قطاع التأمين…
سقط المتاع: والمخابرات؟
المنسي: هادوك وصاني عليهم بوهمو حيت فرشو ليه اللعب ديالو
سقط المتاع: ولكن هما را خدامين مع المؤسسات ماشي ديال روسهم
المنسي: المهم يخلص واحد ولا جوج التطاول ديالهم على سيدي بوهمو اللي كان مهلي فيا بالإشهار والنفود ديالو
سقط المتاع: آش عطاك هاد بوهمو؟
المنسي: عطاني التسبيق ديال الشقة الفاخرة في خليج بورقراق، وطلب من الصفريوي يختار ليا شقة ممتازة وتخفيض مهم
سقط المتاع: وإلياس الكيماوي؟
المنسي: كان صاحبي وما قضالي والو فيه غير الهضرا
سقط المتاع: وعباس الفاسي؟
المنسي: هاداك بزاف طلبوني باش نعطيه في الحكومة وخارج الحكومة وحتى م امحمد الخليفة سابقا
سقط المتاع: والمشرافي ديال المغربية للألعاب؟
المنسي: هاداك قضية ديال سيدي بوهمو فين ما بغا هو والصرارفية ديالو الخدمة فشي واحد باش يديرو ديالهم، كيعطيني الأمر باش نشوهو بالباطل أو بالحق، المهم ننوض عليه العجاجة حتى يزول، ولكن هذا كان داير علاش حيت المعلومات عطاها ليا صاحبهم العلمي اللي حاطين في البورصة داك الشي ديالو كان مضبوط.
سقط المتاع: والقادة ديال القوات المسلحة الملكية والدرك مالهم؟
المنسي: أنا معارفش علاش، ولكن ربما بغاو يديرو تما الجنرال بوهمو ولا الجنرال التلمساني باش يشدو القطاعات كلها، البزولة والزرواطة
سقط المتاع: وهادشي ديالك خطير، ولكن هادوك كابرين بدانون ما يقدوش على صحاب الزيت البلدية والبصارة والمحراش، هاداك المغرب لحرش ما يقدوش عليه
المنسي: أنا كنت غالط فيهم وفي حساباتهم، أنا ملي جمد ليا وزير العدل التنفيذ ديال الأحكام ضسرت، وما بقيتش كا نمشي للمحاكم والدعاوي اللي رافعين عليا الضحايا، كلفت محامي صغير باش يقابل داك الشي
سقط المتاع: شحال في الساعة دابا؟
المنسي: هادي الثالثة صباحا
سقط المتاع: نرتاحو دابا ومن بعد انكملوا…
وإلى سمر قادم
بواب محراب أكورا
